Şuşanın azad edilməsi – Zəfər Gününün tarixi rəmzi
Şuşa Azərbaycan xalqının milli-mədəni yaddaşında xüsusi yer tutan şəhərdir. Qarabağın tacı adlandırılan bu qədim şəhər tarixən Azərbaycanın dövlətçilik, musiqi, ədəbiyyat və incəsənət həyatında mühüm rol oynayıb. Şuşanın işğalı xalqımız üçün ağır mənəvi itki olsa da, şəhərin azad olunacağına inam heç vaxt sarsılmadı. Bu inam 2020-ci il noyabrın 8-də tarixi gerçəkliyə çevrildi.
Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun həyata keçirdiyi uğurlu hərbi əməliyyatlar Şuşanın azad edilməsini mümkün etdi. Şəhərin mürəkkəb dağlıq relyefi və düşmənin qurduğu müdafiə mövqeləri əməliyyatı çətinləşdirirdi. Lakin Azərbaycan əsgərlərinin yüksək döyüş ruhu, peşəkarlığı və Vətən sevgisi bu maneələri aradan qaldırdı.
Şuşanın azad edilməsi Vətən müharibəsinin gedişinə həlledici təsir göstərdi. Azərbaycan əsgərləri şəhərə yaxınlaşmaq və onu düşmən işğalından qurtarmaq üçün misilsiz cəsarət nümayiş etdirdilər. Bu əməliyyat hərb tariximizdə xüsusi yer tutan qəhrəmanlıq nümunəsinə çevrildi. Noyabrın 8-də Prezident İlham Əliyevin xalqa müraciət edərək Şuşanın azad olunduğunu elan etməsi milyonlarla insanın sevincinə səbəb oldu.
Şuşanın azadlığından sonra şəhərdə genişmiqyaslı bərpa və yenidənqurma işlərinə başlanıldı. Tarixi abidələr, məscidlər, mədəniyyət ocaqları bərpa edilir, yeni yollar və infrastruktur yaradılır. Şuşanın Azərbaycanın mədəniyyət paytaxtı elan olunması, burada beynəlxalq tədbirlərin keçirilməsi şəhərin əvvəlki şöhrətinin yenidən canlandırılmasına xidmət edir.
Bu gün 8 Noyabrın Zəfər Günü kimi qeyd edilməsi Şuşanın azadlığı ilə bağlıdır. Şuşa artıq yalnız keçmişin xatirəsi deyil, müasir Azərbaycanın gücünün, milli birliyinin və tarixi ədalətin bərpasının rəmzidir. Bu şəhərin azadlığı uğrunda canından keçən qəhrəmanlarımızın xatirəsi daim ehtiramla anılacaq.
Gövhər Məmmədova,
YAP Nizami rayon təşkilatının “Bəhruz Nuriyev küçəsi, 15” ərazi partiya təşkilatının sədr müavini
