44 günlük Vətən müharibəsi – milli iradənin və hərbi qüdrətin təntənəsi
2020-ci il sentyabrın 27-də başlayan Vətən müharibəsi Azərbaycan tarixində yeni bir dövrün başlanğıcı oldu. Ermənistan silahlı qüvvələrinin təxribatlarına cavab olaraq Azərbaycan Ordusu əks-hücum əməliyyatlarına başladı. Uzun illər işğal altında qalan torpaqlarımızın azad edilməsi uğrunda aparılan mübarizə cəmi 44 gün davam etsə də, bu müddət xalqımızın yaddaşında əsrlər boyu yaşayacaq tarixi hadisələrlə yadda qaldı.
Müharibənin ilk günlərindən etibarən Azərbaycan dövləti beynəlxalq hüquqa əsaslanan mövqeyini qətiyyətlə müdafiə etdi. Prezident İlham Əliyev ölkəmizin haqlı mübarizəsini beynəlxalq ictimaiyyətə çatdırdı, müxtəlif media qurumlarına müsahibələrində Azərbaycanın məqsədinin ərazi bütövlüyünü bərpa etmək olduğunu vurğuladı. Dövlət başçısının siyasi iradəsi və diplomatik fəaliyyəti hərbi uğurların beynəlxalq müstəvidə də əhəmiyyətini artırdı.
Azərbaycan Ordusu müharibə ərzində 300-dən çox yaşayış məntəqəsini, şəhər və kəndləri, eləcə də strateji yüksəklikləri işğaldan azad etdi. Hərbi əməliyyatlar zamanı ordumuzun müasir texnologiyalardan istifadə etməsi, dəqiq zərbələr endirməsi və çevik taktiki qərarları düşmənin müdafiə sistemini ciddi şəkildə zəiflətdi. Əsgər və zabitlərimizin döyüş əzmi isə bütün bu uğurların əsas hərəkətverici qüvvəsi oldu.
Noyabrın 8-də Şuşanın azad edilməsi müharibənin həlledici hadisəsinə çevrildi. Bu qələbə Ermənistanın hərbi-siyasi rəhbərliyini reallığı qəbul etməyə məcbur etdi və noyabrın 10-da üçtərəfli bəyanatın imzalanması ilə hərbi əməliyyatlar dayandırıldı. Beləliklə, Azərbaycanın hərbi uğurları ölkəmizin ərazi bütövlüyünün bərpası istiqamətində tarixi nəticə verdi.
44 günlük müharibə xalqımızın birliyini, dövlətimizin gücünü və Azərbaycan Ordusunun qüdrətini təsdiqlədi. Bu gün Zəfər Günü həmin mübarizənin nəticəsi kimi qeyd olunur. Şəhidlərimizin qanı bahasına əldə edilən Qələbə hər bir azərbaycanlı üçün müqəddəs dəyərdir və dövlətimizin gələcək inkişaf yoluna işıq salır.
Sülhanə Nəsibova,
YAP Nizami rayon təşkilatının “Bəkir Çobanzadə küçəsi, 345” ərazi partiya təşkilatının sədr müavini
