28 May Azərbaycan xalqının tarixində böyük əhəmiyyət daşıyan müqəddəs günlərdən biridir. Bu tarixdə xalqımız öz azadlığını və müstəqilliyini bütün dünyaya bəyan edərək Azərbaycan Xalq Cümhuriyyətinin elan edilməsi ilə yeni bir dövrə qədəm qoydu. Bu hadisə yalnız Azərbaycan üçün deyil, bütün Şərq aləmi üçün mühüm yenilik idi. Çünki Azərbaycan Şərqdə ilk demokratik respublika quran dövlət oldu.
Azərbaycan Xalq Cümhuriyyəti xalqın milli iradəsini və azad yaşamaq arzusunu özündə əks etdirirdi. Dövlət qurucuları qısa müddət ərzində mühüm işlər həyata keçirdilər. Milli bayraq qəbul edildi, ordu yaradıldı, məktəblər açıldı və dövlət idarəçiliyi formalaşdırıldı. Həmin dövrdə atılan addımlar bugünkü müstəqil Azərbaycanın təməl daşları hesab olunur.
Cümhuriyyət dövründə insanların hüquq və azadlıqlarına xüsusi önəm verilirdi. Qadınlara seçki hüququnun verilməsi Azərbaycanın demokratik dəyərlərə nə qədər böyük önəm verdiyini göstərirdi. Bu, bir çox inkişaf etmiş ölkələrdən belə əvvəl həyata keçirilmiş mühüm qərar idi.
Azərbaycan xalqı tarix boyu azadlığı uğrunda böyük mübarizələr aparıb. Cümhuriyyətin süqutundan sonra belə xalqımız müstəqillik arzusundan vaz keçmədi. Uzun illər sonra Azərbaycan yenidən öz dövlət müstəqilliyini bərpa etdi və bu gün güclü dövlət kimi inkişafını davam etdirir.
Bu gün ölkəmizdə Müstəqillik Günü böyük coşqu ilə qeyd olunur. İnsanlar dövlət bayrağını qürurla dalğalandırır, vətən sevgisini nümayiş etdirirlər. Keçirilən tədbirlər xalqımızın birlik və həmrəyliyini daha da gücləndirir.
28 May gənclərə vətənə bağlılıq, dövlətə sədaqət və milli dəyərlərə hörmət hissi aşılayır. Hər bir gənc bilməlidir ki, bugünkü azad və müstəqil həyatımız böyük fədakarlıqlar nəticəsində qazanılıb. Bu müstəqilliyi qorumaq isə hər birimizin borcudur.
Müstəqillik Günü xalqımızın qürur mənbəyidir. Bu əlamətdar gün bizə bir daha xatırladır ki, azadlıq və müstəqillik ən böyük sərvətdir. Qoy Azərbaycan daim güclü, müstəqil və firavan dövlət olaraq yaşasın.
Kəmalə Abdullayeva,
YAP Nizami rayon təşkilatının fəalı
