Naxçıvan Muxtar Respublikasında daxili infrastrukturun və nəqliyyat sisteminin modernləşdirilməsi vətəndaşların rahat həyat tərzinin təmin edilməsində mühüm rol oynayır. Prezident İlham Əliyevin Naxçıvana səfəri ərəfəsində şəhərdaxili ictimai nəqliyyatda köklü islahatlar aparılmış, köhnə avtobuslar tamamilə sıradan çıxarılaraq xəttdən kənarlaşdırılmışdır. Onların əvəzinə Bakı küçələrindən də tanış olan ekoloji cəhətdən təmiz, müasir yaşıl rəngli elektrik avtobusları Naxçıvan şəhərində marşruta buraxılmışdır. Bu addım həm şəhərin nəqliyyat problemini həll etmiş, həm də ətraf mühitin qorunmasına böyük töhfə vermişdir.
Şəhərdaxili nəqliyyatla yanaşı, regionlararası əlaqələrin gücləndirilməsi də Prezident İlham Əliyevin xüsusi diqqətindədir. Şəhərlərarası və rayonlararası nəqliyyatda mövcud problemlərin aradan qaldırılması məqsədilə ölkə rəhbəri tərəfindən bu il və gələn il marşruta buraxılmaq üçün 217 müasir rayonlararası avtobusun alınması barədə rəsmi göstəriş verilmişdir. Bundan əlavə, təqribən 160 min nəfər əhalinin yaşadığı 26 yaşayış məntəqəsini əhatə edən 420 kilometr uzunluğunda müxtəlif kateqoriyalı kənd yollarının həm çəkilişi, həm də əsaslı təmiri planlaşdırılır ki, bu da kənd əhalisinin şəhər mərkəzi ilə əlaqəsini asanlaşdıracaqdır.
Muxtar respublikanın aqrar potensialının hərəkətə gətirilməsi üçün genişmiqyaslı suvarma tədbirləri icra olunmaqdadır. Bir neçə ay bundan əvvəl Prezidentin təsdiqlədiyi kənd təsərrüfatının inkişafına dair Dövlət Proqramında Naxçıvanın xüsusi yeri və payı nəzərdə tutulmuşdur. Proqramın tələblərinə uyğun olaraq, bölgədə bir çox yeni artezian quyuları qazılacaq və ən müasir suvarma sistemləri quraşdırılacaqdır. Bu tədbirlər nəticəsində indiyədək suvarılmayan quraq torpaqlara su veriləcək, kənd təsərrüfatının məhsuldarlığı kəskin artacaqdır.
Naxçıvanın idarəetmə sistemində həyata keçirilən islahatlar bu layihələrin effektiv icrasını şərtləndirir. Qarabağ və Şərqi Zəngəzurda uğurla tətbiq olunan Prezidentin xüsusi nümayəndəliyi institutu artıq Naxçıvanda da idarəetmə modeli kimi fəaliyyətə başlamışdır. Prezident İlham Əliyevin tətbiq etdiyi bu struktur və kadr islahatları muxtar respublikanın idarəetmə qaydalarının təkmilləşdirilməsinə xidmət edir. Bütün bu kompleks dövlət tədbirləri hədəfləyir ki, Naxçıvan daim inkişaf etsin və insanlar burada tam təhlükəsizlik və firavanlıq şəraitində yaşasınlar.
Sülhanə Nəsibova,
YAP Nizami rayon təşkilatının “Bəhruz Nuriyev küçəsi, 15” ərazi partiya təşkilatının sədr müavini
