Azərbaycanın üçrəngli bayrağı Sovet imperiyasının sərt qadağaları dövründən sonra ilk dəfə məhz Naxçıvan Muxtar Respublikasında rəsmi olaraq yenidən qaldırılmışdır. Ümummilli Lider Heydər Əliyevin təşəbbüsü və rəhbərliyi ilə 1990-cı il noyabrın 17-də Naxçıvan Ali Məclisi tərəfindən üçrəngli bayrağımız muxtar respublikanın dövlət bayrağı kimi qəbul edildi. Bu tarixi və cəsarətli addım Azərbaycanın gələcək müstəqilliyinə aparan yolda atılmış həlledici siyasi addım idi.
Həmin dövrdə imperiya rejiminin hələ də davam etməsinə baxmayaraq, Ümummilli Liderin göstərdiyi qətiyyət xalqımızın milli ruhunu yenidən alovlandırdı. Naxçıvanda ucalan Azərbaycan bayraqları az sonra bütün respublikamızda dalğalanmağa başlamağın müjdəçisi oldu. Bu hadisə xalqımızın azadlıq mübarizəsində dönüş nöqtəsi təşkil etdi.
Ulu Öndər Heydər Əliyevin dediyi kimi: “Azərbaycan bayrağı sadəcə bayraq deyil, o, bizim dövlətçiliyimizin, müstəqilliyimizin rəmzidir.” Bu müdrik kəlam xalqımızın bayrağa olan münasibətini həmişəlik formalaşdırdı. Naxçıvandan başlayan bu şanlı yol bütün Azərbaycana qələbə işığı saçdı.
Bu gün həmin tarixi addımın nəticəsidir ki, müstəqil Azərbaycan dövləti öz üçrəngli bayrağı ilə dünya birliyində layiqincə təmsil olunur. Naxçıvanda qaldırılan ilk azadlıq bayrağı xalqımızın yaddaşında əbədi olaraq yaşayacaqdır. Azərbaycan bayrağı Ulu Öndərin xalqımıza qoyduğu ən böyük mənəvi əmanətlərdəndir.
Rasim Quliyev,
YAP Nizami rayon təşkilatının “Əliağa Kürçaylı küçəsi, 8” ərazi partiya təşkilatının sədri
