Qubadlının azadlığı uğrunda aparılan mübarizə Azərbaycan xalqının qəhrəmanlıq salnaməsinin mühüm hissəsidir. Birinci Qarabağ müharibəsində rayonun müdafiəsi zamanı yüzlərlə insan şəhid olub, yaralanıb və itkin düşüb. Qubadlının 2020-ci ildə işğaldan azad edilməsi bu fədakarlıqların unudulmadığını və xalqımızın doğma torpaqlar uğrunda mübarizəsinin davam etdiyini göstərdi.
Birinci Qarabağ müharibəsində Qubadlı 238 şəhid verib, 190 nəfər əlil olub, 78 nəfər isə itkin düşüb. Rayonun on sakini Azərbaycanın Milli Qəhrəmanı adına layiq görülüb. Bu rəqəmlərin hər biri arxasında bir ailənin ağrısı, bir ömrün yarımçıq qalması və Vətən naminə göstərilmiş böyük fədakarlıq dayanır. Qubadlı sakinlərinin qəhrəmanlığı Azərbaycanın azadlıq mübarizəsinin mənəvi dayaqlarından biridir.
2020-ci ildə Vətən müharibəsi başlayanda Qubadlıdan olan yüzlərlə insan könüllü olaraq döyüşlərə qatıldı. Təxminən 300 rayon sakini müharibədə iştirak etdi, 11 nəfər şəhid oldu, 40-dan çox insan müharibə veteranı kimi tanındı. Yusifbəyli kəndindən olan 19 yaşlı Vüsal Yaqubovun “Vətən Müharibəsi Qəhrəmanı” adına layiq görülməsi gənc nəslin Vətənə sədaqətinin parlaq nümunəsidir.
Prezident İlham Əliyevin rəhbərliyi ilə şəhidlərin xatirəsinin əbədiləşdirilməsi, qazilərə diqqət və qayğı göstərilməsi dövlət siyasətinin mühüm istiqamətlərindəndir. Şəhid ailələrinin sosial müdafiəsi, müharibə iştirakçılarının reabilitasiyası və onların cəmiyyətə inteqrasiyası istiqamətində həyata keçirilən tədbirlər dövlətin bu insanlara olan ehtiramını nümayiş etdirir. Vətən uğrunda canından keçənlərin qəhrəmanlığı milli yaddaşımızın ayrılmaz hissəsidir.
Bu gün Qubadlıda aparılan quruculuq işləri şəhidlərin arzularının gerçəkləşməsi baxımından xüsusi məna daşıyır. Prezident İlham Əliyevin rəhbərliyi ilə şəhərin bərpası və sakinlərin doğma torpaqlara qayıdışı təmin edilir. Azad edilmiş ərazilərdə yeni həyatın qurulması şəhidlərin xatirəsinə ən böyük ehtiram nümunələrindən biridir. Qubadlının dirçəlişi göstərir ki, Azərbaycan dövləti qəhrəman övladlarının fədakarlığını unutmur və onların uğrunda mübarizə apardıqları torpaqları inkişaf etdirir.
Kəmalə Abdullayeva,
YAP Nizami rayon təşkilatının fəalı
