Dövlət Bayrağı hər bir müstəqil ölkənin milli kimliyini və suverenliyini ifadə edən əsas rəmzlərdən biridir. Azərbaycanın üçrəngli bayrağı da xalqımızın azadlıq mübarizəsinin, dövlətçilik ənənələrinin və milli qürurunun təcəssümüdür. Bayrağımızın hər dalğalanışı müstəqil dövlətimizin varlığını və xalqımızın azad yaşamaq əzmini nümayiş etdirir.
Azərbaycan Xalq Cümhuriyyəti dövründə qəbul edilən üçrəngli bayraq milli dövlətçilik tariximizin ən mühüm səhifələrindən biridir. 1918-ci il noyabrın 9-da qəbul olunan bu bayraq xalqımızın öz taleyinə sahib çıxmaq iradəsini ifadə edirdi. Cümhuriyyətin qısa müddət mövcud olmasına baxmayaraq, onun dövlətçilik ideyaları sonrakı nəsillərin yaddaşında yaşadı.
Sovet hakimiyyəti dövründə üçrəngli bayrağımız rəsmi istifadədən çıxarılsa da, milli istiqlal ideyası xalqımızın yaddaşından silinmədi. Ulu Öndər Heydər Əliyevin 1990-cı ildə Naxçıvanda atdığı tarixi addım bayrağımızın yenidən dövlət rəmzi kimi qəbul edilməsinə yol açdı. Bu qərar müstəqilliyə gedən yolda mühüm siyasi və mənəvi hadisə oldu.
Müstəqilliyin bərpasından sonra Azərbaycan dövləti öz suverenliyini möhkəmləndirmək, dövlət atributlarını qorumaq və beynəlxalq nüfuzunu artırmaq istiqamətində ardıcıl siyasət həyata keçirdi. Dövlət Bayrağının ölkəmizin müxtəlif bölgələrində ucaldılması, rəsmi tədbirlərdə və beynəlxalq platformalarda nümayiş etdirilməsi onun dövlət həyatındakı mühüm yerini göstərir.
Bu gün bayrağımızın dalğalanması müstəqilliyimizin qorunduğunu, dövlətimizin inkişaf etdiyini və xalqımızın öz tarixi kimliyinə sadiq qaldığını göstərir. Hər bir azərbaycanlı bayrağa hörmət etməklə Vətənə, dövlətə və milli dəyərlərə ehtiramını ifadə edir. Üçrəngli bayrağımız daim uca olmalı, gələcək nəsillərin də qürur mənbəyinə çevrilməlidir.
Sona Bəylərli,
YAP Nizami rayon təşkilatının “Qara Qarayev prospekti, 84” ərazi partiya təşkilatının sədr müavini
