Cənab Prezident İlham Əliyevin və Ukrayna Prezidenti Volodimir Zelenskinin 25 aprel tarixində Bakıda keçirilən görüşü və görüşdən sonra mətbuata verilən bəyanatlar iki ölkə arasında münasibətlərin hazırkı vəziyyətini və gələcək perspektivlərini aydın şəkildə ortaya qoydu. Bu səfər Azərbaycan ilə Ukrayna arasında siyasi, iqtisadi və humanitar əməkdaşlığın daha da möhkəmləndirilməsi baxımından mühüm əhəmiyyət daşıyır. İlham Əliyev öz bəyanatında vurğuladı ki, Azərbaycan ilə Ukrayna arasında münasibətlər dostluq və qarşılıqlı hörmət prinsipləri əsasında qurulub. O qeyd etdi ki, hər iki ölkə bir-birinin ərazi bütövlüyünü və suverenliyini daim dəstəkləyir. Bu məqam xüsusilə indiki mürəkkəb geosiyasi şəraitdə böyük əhəmiyyət kəsb edir. Prezident bildirdi ki, beynəlxalq hüququn norma və prinsiplərinə riayət olunması regionda sabitliyin təmin olunmasının əsas şərtidir.
Görüş zamanı iqtisadi əməkdaşlıq məsələləri də geniş müzakirə olundu. İlham Əliyev qeyd etdi ki, Azərbaycan Ukrayna ilə enerji sahəsində əməkdaşlığın inkişafına xüsusi önəm verir. Azərbaycanın zəngin enerji resursları və nəqliyyat infrastrukturu Ukraynanın enerji təhlükəsizliyinin təmin olunmasında mühüm rol oynaya bilər.
Bu kontekstdə tərəflər enerji tədarükü, alternativ enerji mənbələri və logistika imkanlarının genişləndirilməsi istiqamətində əməkdaşlığın artırılması barədə razılığa gəldilər. Bəyanatda humanitar sahəyə də xüsusi diqqət ayrıldı. Cənab Prezident İlham Əliyev vurğuladı ki, Azərbaycan Ukraynaya humanitar yardım göstərməyə davam edir və bu istiqamətdə əməkdaşlıq gələcəkdə də davam etdiriləcək. O, həmçinin qeyd etdi ki, müharibədən zərər çəkmiş insanların ehtiyaclarının qarşılanması beynəlxalq ictimaiyyətin əsas prioritetlərindən biri olmalıdır.
Bu, Azərbaycanın humanitar siyasətinin əsas istiqamətlərindən biri kimi təqdim olundu. Öz növbəsində, Volodimir Zelenski Azərbaycan rəhbərliyinə və xalqına göstərilən dəstəyə görə təşəkkürünü bildirdi.
O qeyd etdi ki, Azərbaycan Ukraynanın ərazi bütövlüyünü dəstəkləyən ölkələrdən biridir və bu dəstək Ukrayna üçün çox önəmlidir. Zelenski vurğuladı ki, iki ölkə arasında əməkdaşlıq yalnız siyasi sahə ilə məhdudlaşmır, eyni zamanda iqtisadi və mədəni sahələri də əhatə edir. Zelenski həmçinin Azərbaycanın regionda oynadığı rolu yüksək qiymətləndirdi. O qeyd etdi ki, Azərbaycan mühüm nəqliyyat və enerji mərkəzi kimi çıxış edir və bu, Ukrayna üçün də yeni imkanlar yaradır. Xüsusilə, Orta Dəhliz kimi tanınan nəqliyyat marşrutlarının inkişafı iki ölkə arasında ticarət əlaqələrinin genişlənməsinə töhfə verə bilər.
Mətbuata verilən bəyanatlar zamanı tərəflər beynəlxalq təşkilatlar çərçivəsində əməkdaşlığın da vacibliyini vurğuladılar. Qeyd olundu ki, Azərbaycan və Ukrayna bir çox beynəlxalq platformalarda bir-birini dəstəkləyir və bu əməkdaşlıq gələcəkdə də davam etdiriləcək. Bu, iki ölkənin qlobal məsələlərdə ortaq mövqedən çıxış etdiyini göstərir. Səfərin mühüm nəticələrindən biri də gələcək əməkdaşlıq istiqamətlərinin müəyyənləşdirilməsi oldu. Tərəflər razılaşdılar ki, iqtisadi əlaqələrin daha da genişləndirilməsi, investisiya mühitinin yaxşılaşdırılması və birgə layihələrin həyata keçirilməsi üçün əlavə addımlar atılacaq. Bu, həm Azərbaycan, həm də Ukrayna üçün qarşılıqlı faydalı nəticələr verə bilər.
Rüstəmov Bəhruz,
Yeni Azərbaycan Partiyası məsləhətçi
