“1993-cü il 3 oktyabr tarixində keçirilən ümumxalq səsverməsi nəticəsində Ulu Öndər Heydər Əliyevin Azərbaycan Respublikasının Prezidenti seçilməsi ölkənin dövlətçilik tarixində yeni mərhələnin başlanğıcını formalaşdırdı.1993-cü ildə Azərbaycanın qarşısında duran problem müstəqil dövlətin özünün qorunması və institusional əsaslarının yaradılması məsələsi idi. Siyasi qarşıdurmalar, təhlükəsizlik problemləri, iqtisadi çətinliklər və idarəetmə böhranı dövlətin fəaliyyət qabiliyyətinə birbaşa təsir göstərirdi. Ulu Öndər Heydər Əliyevin iyun ayında siyasi rəhbərliyə qayıdışından sonra dövlət quruculuğu məsələlərinin ön plana çəkilməsi və oktyabrın 3-də prezident seçilməsi həmin prosesin mühüm mərhələsini təşkil etdi. Bu baxımdan 3 oktyabrı siyasi hakimiyyətin formalaşması ilə yanaşı, dövlətin institusional bərpası və siyasi idarəetmənin sistemləşdirilməsi kontekstində təhlil etmək daha doğru yanaşmadır”.
Bunu açıqlamasında Yeni Azərbaycan Partiyası Nizami rayon təşkilatının sədr müavini Rəşadət Xalıqov deyib.
Rəşadət Xalıqov bildirib ki, 1993-cü ildən sonrakı mərhələnin ən mühüm nəticələrindən biri dövlətçiliyin hüquqi əsaslarının möhkəmləndirilməsi oldu. 12 noyabr 1995-ci ildə ümumxalq referendumunda qəbul edilən Azərbaycan Respublikasının Konstitusiyası müstəqil dövlətin hüquqi-siyasi sisteminin fundamental çərçivəsini müəyyənləşdirdi. Bu dövrün digər mühüm istiqaməti iqtisadi suverenliyin və davamlı inkişaf üçün maliyyə-iqtisadi bazanın formalaşdırılması idi. Azərbaycanın zəngin enerji resurslarının mövcudluğu öz-özlüyündə iqtisadi inkişafı təmin edə bilməzdi. Əsas məsələ bu resursların milli maraqlara uyğun şəkildə beynəlxalq iqtisadi əməkdaşlığa cəlb edilməsi, investisiyaların ölkəyə gətirilməsi və enerji gəlirlərinin uzunmüddətli dövlətçilik məqsədlərinə yönəldilməsi idi. 20 sentyabr 1994-cü ildə imzalanan “Əsrin müqaviləsi” bu baxımdan dönüş nöqtələrindən biri oldu. 7 ölkəni təmsil edən 11 beynəlxalq şirkətin iştirak etdiyi, 7,4 milyard dollar həcmində qiymətləndirilən müqavilə Azərbaycanın enerji sektoruna beynəlxalq kapitalın geniş miqyasda cəlb olunmasına imkan yaratdı. Bakı-Novorossiysk və Bakı-Supsa istiqamətlərinin ardınca Bakı-Tbilisi-Ceyhan neft kəmərinin və Bakı-Tbilisi-Ərzurum qaz kəmərinin yaradılması enerji siyasətinin regional və beynəlxalq ölçülərini genişləndirdi. Bunun nəticəsində enerji infrastrukturu Azərbaycanın beynəlxalq əlaqələrinin, investisiya imkanlarının və regional əməkdaşlıq siyasətinin mühüm komponentinə çevrildi.
Onun sözlərinə görə, 1993-cü il 3 oktyabr tarixində Ulu Öndər Heydər Əliyevin Prezident seçilməsi ilə Azərbaycan tarixinin yeni mərhələsi başlandı. Bu, dövlətin hüquqi əsaslarının möhkəmləndirilməsi, təhlükəsizlik sisteminin qurulması, iqtisadi suverenliyin gücləndirilməsi, beynəlxalq əlaqələrin genişləndirilməsi və milli dövlətçilik düşüncəsinin institusional məzmun qazanması ilə xarakterizə olunan uzunmüddətli tarixi prosesin mühüm başlanğıc mərhələsi idi.
