Dövlət başçısı milli komandanı mötəbər yarışda qazandıqları parlaq qələbə münasibətilə təbrik edərək bildirib ki, bu uğur bütün cəmiyyət tərəfindən böyük sevinclə qarşılanıb. Prezident qeyd edib ki, Avropa çempionatında komanda hesabında birinci olmaq yüksək nəticə olmaqla yanaşı, həm də gərgin və rəqabətli mübarizə şəraitində əldə edildiyi üçün xüsusi əhəmiyyət daşıyır. İlham Əliyev yarışların bir qismini izlədiyini vurğulayaraq Azərbaycan güləşçilərinin peşəkarlıq, iradə və döyüş ruhu nümayiş etdirərək rəqiblər üzərində inamlı qələbələr qazandıqlarını qeyd edib.
Görüş zamanı vurğulanıb ki, əldə olunan nəticə Azərbaycan güləş məktəbinin gücünü və davamlı inkişafını bir daha təsdiqləyir. Dövlət başçısı güləşin ölkəmizdə dərin köklərə malik olduğunu bildirərək, bu ənənələrin uğurla yaşadıldığını və yeni nəsil idmançıların yetişdirildiyini diqqətə çatdırıb. Qeyd olunub ki, gənc güləşçilərin beynəlxalq arenada yüksək nəticələr əldə etməsi məşq və seleksiya sisteminin düzgün qurulduğunu göstərir.
Prezident İlham Əliyev beynəlxalq yarışlarda Azərbaycan bayrağının ucaldılmasının xalqımızda qürur hissi yaratdığını vurğulayaraq, idman uğurlarının gənc nəslin vətənpərvərlik ruhunda formalaşmasında mühüm rol oynadığını bildirib. Eyni zamanda, idmanın cəmiyyət həyatında xüsusi yer tutduğu və son illər bu sahədə əldə olunan nailiyyətlərin dövlət siyasətinin uğurlu nəticəsi olduğu qeyd edilib.Dövlət başçısı çıxışında Azərbaycanın idman sahəsində qazandığı ümumi uğurlara da toxunaraq bildirib ki, ölkə idmançıları Olimpiya Oyunları, dünya və Avropa çempionatlarında daim yüksək nəticələr göstərirlər. Qeyd olunub ki, idmanda rəqabət güclü olsa da, Azərbaycan idmançılarının qələbə əzmi və hazırlıq səviyyəsi onların uğurlarının əsasını təşkil edir.
Görüşdə həmçinin diqqətə çatdırılıb ki, ölkədə idman infrastrukturunun inkişafı, beynəlxalq yarışların təşkili və idmançılara göstərilən dövlət qayğısı bu sahənin daha da inkişafına təkan verir. Bildirilib ki, Avropa çempionatında həm yunan-Roma, həm sərbəst, həm də qadın güləşi üzrə əldə olunan nəticələr kompleks inkişafın göstəricisidir. Qadın güləşçilərin də medalçılar sırasında yer alması xüsusi vurğulanaraq, gələcəkdə daha böyük nailiyyətlərin əldə olunacağına əminlik ifadə edilib.
Prezident İlham Əliyev milli komandada hökm sürən birlik və yüksək komanda ruhunu müsbət qiymətləndirərək, bu amilin qələbələrdə mühüm rol oynadığını bildirib. Eyni zamanda, idmançıların həm yarışlarda, həm də gündəlik həyatda nümunəvi davranış sərgiləməsinin vacibliyi qeyd olunub. Sonda dövlət başçısı idmançıları bir daha təbrik edib, onlara gələcək yarışlarda yeni uğurlar arzulayıb və Azərbaycanın idman şərəfini bundan sonra da layiqincə qoruyacaqlarına inamını ifadə edib.
İsgəndərov Amil,
Neft Kəmərləri İdarəsinin əməkdaşı
