Böyük Britaniyanın daxili işlər naziri Şabana Mahmud tibbi məqsədlə taksidən istifadə edən sığınacaq axtaranlarla bağlı yeni qadağalar elan edib.
“İcxeberinfo.az” BBC-yə istinadən xəbər verir ki, yeni qaydalara əsasən, taksi yalnız fiziki əlillik, hamiləlik və ya ciddi xəstəlik kimi istisna və sübuta əsaslanan hallarda istifadə oluna biləcək. Nazirliyin qərarına görə, tibbi səfərlər üçün taksi sifarişi yalnız Daxili İşlər Nazirliyinin birbaşa təsdiqi ilə həyata keçiriləcək. Qaydaların fevral ayından qüvvəyə minəcəyi və bütün xidmət təminatçılarının bu tarixdən etibarən taksi istifadəsini dayandırmalı olduqları bildirilib.
Şabana Mahmud qeyd edib ki, hökumət sığınacaq axtaranların tibbi görüşlərə ictimai nəqliyyat vasitəsilə çatdırılması istiqamətində xidmət təminatçıları ilə əməkdaşlıq edir: “Bu hökumətə əvvəlki mühafizəkar administrasiyadan vergiödəyicilərinin milyardlarla vəsaitinin israf olunduğu müqavilələr miras alıb. Mən xəstəxana görüşləri üçün taksidən məhdudiyyətsiz istifadəyə son qoyuram və bunu yalnız ən istisna hallarda təsdiq edəcəyəm”.
