Prezident İlham Əliyevin Şuşada Slovakiya Prezidenti Peter Pelleqrini ilə birgə bəyanatı: Azərbaycan–Slovakiya münasibətlərində yeni strateji mərhələ
2026-cı il iyulun 14-də Azərbaycan Respublikasının Prezidenti İlham Əliyevin dəvəti ilə Slovakiya Respublikasının Prezidenti Peter Pelleqrininin ölkəmizə rəsmi səfəri çərçivəsində Şuşa şəhərində keçirilən görüş və mətbuata verilən birgə bəyanatlar Azərbaycan–Slovakiya münasibətlərinin inkişafında mühüm mərhələ kimi qiymətləndirilir. Dövlət başçılarının Qarabağın mədəni paytaxtı olan Şuşada görüşməsi həm rəmzi, həm də siyasi baxımdan xüsusi əhəmiyyət daşıyır. Bu görüş Azərbaycanın suverenliyinin, ərazi bütövlüyünün və işğaldan azad edilmiş ərazilərdə aparılan genişmiqyaslı bərpa-quruculuq işlərinin beynəlxalq ictimaiyyətə təqdim olunması baxımından mühüm mesaj verdi.
Prezident İlham Əliyev çıxışında Azərbaycan ilə Slovakiya arasında münasibətlərin qarşılıqlı hörmət, etibarlı tərəfdaşlıq və ortaq maraqlar əsasında inkişaf etdiyini vurğuladı. Dövlət başçısı qeyd etdi ki, ötən il Slovakiyaya etdiyi rəsmi səfərin davamı olaraq Prezident Peter Pelleqrininin Azərbaycana səfəri siyasi dialoqun ardıcıl və dinamik inkişafının göstəricisidir. Görüşlər zamanı iqtisadiyyat, enerji, nəqliyyat, sənaye, investisiya, humanitar sahə və digər istiqamətlər üzrə əməkdaşlığın genişləndirilməsi məsələləri ətrafında səmərəli fikir mübadiləsi aparıldı.
Şuşada keçirilən görüş zamanı Prezident İlham Əliyev Qarabağ və Şərqi Zəngəzurda həyata keçirilən bərpa və yenidənqurma layihələri barədə ətraflı məlumat verdi. Bildirildi ki, işğaldan azad edilmiş ərazilərdə ən müasir şəhərsalma prinsipləri tətbiq olunur, “ağıllı şəhər” və “ağıllı kənd” konsepsiyalarına uyğun layihələr reallaşdırılır. Dövlət başçısı Slovakiya şirkətlərinin bu prosesdə iştirakını yüksək qiymətləndirərək bunu iqtisadi əməkdaşlığın uğurlu nümunəsi kimi dəyərləndirdi. Slovakiya Prezidentinin də bu layihələrə maraq göstərməsi gələcək əməkdaşlığın perspektivlərinin geniş olduğunu göstərir.
Prezident İlham Əliyev Azərbaycanın Avropanın enerji təhlükəsizliyinin təmin edilməsində mühüm rol oynadığını xüsusi vurğuladı. Qeyd edildi ki, Azərbaycan etibarlı enerji tərəfdaşı kimi Avropa ölkələri ilə əməkdaşlığını ardıcıl şəkildə genişləndirir və Slovakiya ilə də bu sahədə yeni imkanlar mövcuddur. Bununla yanaşı, nəqliyyat dəhlizləri, logistika, ticarət və investisiya istiqamətlərində əməkdaşlığın inkişafı da əsas müzakirə mövzularından biri oldu.
Birgə bəyanatda beynəlxalq münasibətlər, regional təhlükəsizlik və qarşılıqlı dəstək məsələlərinə də geniş yer verildi. Prezident İlham Əliyev Azərbaycanın beynəlxalq hüququn norma və prinsiplərinə əsaslanan xarici siyasət kursunu davam etdirdiyini, dövlətlərin suverenliyi və ərazi bütövlüyünə hörmət prinsipinin ölkəmizin dəyişməz mövqeyi olduğunu bir daha bəyan etdi. Bu yanaşma Azərbaycanın beynəlxalq aləmdə etibarlı və məsuliyyətli tərəfdaş kimi mövqeyini daha da möhkəmləndirir.
Şuşanın görüş məkanı kimi seçilməsi xüsusi rəmzi məna daşıyır. Bu, azad edilmiş torpaqlarda həyatın bərpasını, müasir infrastrukturun qurulmasını və beynəlxalq əməkdaşlığın genişlənməsini əks etdirən mühüm siyasi mesajdır. Slovakiya Prezidentinin bölgədə həyata keçirilən genişmiqyaslı bərpa-quruculuq işlərini yüksək qiymətləndirməsi Azərbaycanın həyata keçirdiyi inkişaf strategiyasına beynəlxalq dəstəyin daha bir göstəricisi oldu.
Prezident İlham Əliyevin Şuşada səsləndirdiyi fikirlər bir daha təsdiqlədi ki, Azərbaycan milli maraqlara əsaslanan, balanslaşdırılmış və praqmatik xarici siyasət kursunu uğurla davam etdirir. Slovakiya ilə münasibətlərin inkişafı yalnız ikitərəfli əməkdaşlığın möhkəmlənməsinə deyil, eyni zamanda Azərbaycan–Avropa İttifaqı əlaqələrinin genişlənməsinə, enerji təhlükəsizliyinin gücləndirilməsinə, iqtisadi tərəfdaşlığın dərinləşməsinə və regional sabitliyin möhkəmlənməsinə də mühüm töhfə verir.
Əminliklə demək olar ki, Şuşada keçirilən bu yüksək səviyyəli görüş və mətbuata verilən birgə bəyanatlar Azərbaycan diplomatiyasının növbəti uğuru olmaqla yanaşı, ölkəmizin beynəlxalq nüfuzunun artdığını, Qarabağın yenidən qurulması prosesinin beynəlxalq əməkdaşlıq üçün yeni imkanlar yaratdığını və Prezident İlham Əliyevin rəhbərliyi ilə Azərbaycanın regional və qlobal əməkdaşlıq platformalarında mühüm rol oynamaqda davam etdiyini bir daha nümayiş etdirdi.
İsrayılov Amil,
Yeni Azərbaycan Partiyası Şirvan şəhər təşkilatı Məsləhətçisi
