Həqiqətin Retorikası: IV Şuşa Qlobal Media Forumu
Sözün gücü hər zaman mühüm təsir vasitələrindən biri olub. Çünki hərbi uğurlar müəyyən nəticələr əldə etsə də, düşünülmüş və əsaslandırılmış fikir ictimai rəyə və beynəlxalq münasibətlərə uzunmüddətli təsir göstərir. Bu baxımdan iyulun 13-də Şuşada keçirilən IV Qlobal Media Forumu təkcə media nümayəndələrinin görüşü deyil, həm də siyasi kommunikasiya və beynəlxalq dialoq baxımından diqqətçəkən platforma kimi yadda qaldı.
Dünyanın 50-dən çox ölkəsindən 160-a yaxın xarici jurnalistin iştirakı ilə keçirilən forumda Prezident İlham Əliyev üç saatdan artıq müddətdə çoxsaylı sualları cavablandırdı. Müxtəlif mövzuları əhatə edən müzakirələr Azərbaycanın regional və beynəlxalq məsələlərə yanaşmasının təqdim olunması baxımından əhəmiyyət daşıdı.
Forumun Şuşada keçirilməsi də rəmzi məna daşıyırdı. Şəhərdə aparılan genişmiqyaslı bərpa və yenidənqurma işləri iştirakçılar tərəfindən yerində müşahidə edildi. Bu, Azərbaycanın işğaldan azad olunmuş ərazilərdə həyata keçirdiyi fəaliyyət barədə beynəlxalq auditoriyada birbaşa təsəvvür formalaşdırdı.
Müzakirələr zamanı beynəlxalq gündəmdə olan bir sıra məsələlərə, o cümlədən müxtəlif regional münaqişələrə dair suallar səsləndirildi. Prezident İlham Əliyev cavablarında beynəlxalq hüququn norma və prinsiplərinə, dövlətlərin suverenliyi və ərazi bütövlüyünə hörmətin vacibliyini vurğuladı.
Rusiya–Ukrayna müharibəsi ilə bağlı suala cavabında dövlət başçısı müharibələrin dayandırılmasının vacibliyini qeyd edərək, sülhün bərqərar olunmasının zəruriliyini ifadə etdi. Bu mövqe Azərbaycanın beynəlxalq münasibətlərdə dialoq və sabitliyə üstünlük verdiyini bir daha nümayiş etdirdi.
Çıxış zamanı ölkənin keçdiyi inkişaf yolu, iqtisadi potensialının gücləndirilməsi, nəqliyyat və logistika sahəsində həyata keçirilən layihələr, eləcə də regional əməkdaşlıq perspektivləri barədə də fikirlər səsləndirildi. Bu istiqamətdə görülən işlərin Azərbaycanın beynəlxalq iqtisadi əlaqələrinin genişlənməsinə və regionun tranzit imkanlarının artmasına töhfə verdiyi vurğulandı.
IV Şuşa Qlobal Media Forumu bir daha göstərdi ki, açıq dialoq, əsaslandırılmış arqumentlər və beynəlxalq auditoriya ilə birbaşa ünsiyyət müasir diplomatiyanın mühüm elementlərindəndir. Forum çərçivəsində səsləndirilən fikirlər Azərbaycanın xarici siyasət prioritetlərinin, regional əməkdaşlıq yanaşmasının və beynəlxalq münasibətlərə baxışının təqdim olunması baxımından əhəmiyyətli platforma rolunu oynadı.
Natiq Kərimli,
YAP Şirvan şəhər təşkilatının əməkdaşı
