Bizim rolumuz hər zaman konstruktiv və nəticəyönümlü olmuş, gərginliyin azaldılmasına hesablanmışdır
Prezident İlham Əliyevin IV Şuşa Qlobal Media Forumunda səsləndirdiyi fikirlər Azərbaycanın beynəlxalq münasibətlər sistemində tutduğu mövqeni və həyata keçirdiyi xarici siyasətin əsas prinsiplərini bir daha nümayiş etdirdi. Dövlət başçısının vurğuladığı kimi, “Bizim rolumuz hər zaman konstruktiv və nəticəyönümlü olub, gərginliyin azaldılmasına hesablanıb.” Bu fikir Azərbaycanın regionda və beynəlxalq müstəvidə sülhün, təhlükəsizliyin və qarşılıqlı əməkdaşlığın möhkəmləndirilməsinə verdiyi töhfələrin mahiyyətini aydın şəkildə ifadə edir.
Azərbaycan müstəqillik illərində beynəlxalq hüququn norma və prinsiplərinə əsaslanan xarici siyasət yürüdərək, mübahisələrin dialoq və qarşılıqlı anlaşma yolu ilə həllinə üstünlük verib. Xüsusilə son illərdə ölkəmizin təşəbbüsü ilə reallaşdırılan regional və beynəlxalq layihələr, enerji və nəqliyyat sahəsində yaradılan əməkdaşlıq platformaları dövlətlər arasında etimadın möhkəmlənməsinə, iqtisadi inteqrasiyanın genişlənməsinə və regional sabitliyin güclənməsinə mühüm töhfə verib.
44 günlük Vətən müharibəsindən sonra Azərbaycan regionda dayanıqlı sülhün təmin olunması istiqamətində ardıcıl addımlar atıb, Ermənistanla münasibətlərin normallaşdırılması məqsədilə sülh müqaviləsinin imzalanmasını təşviq edib. Rəsmi Bakı revanşist yanaşmalardan uzaq duraraq, qarşılıqlı suverenliyin və ərazi bütövlüyünün tanınmasına əsaslanan yeni əməkdaşlıq mühitinin formalaşdırılmasının tərəfdarı olduğunu dəfələrlə bəyan edib. Bu yanaşma Prezident İlham Əliyevin qeyd etdiyi konstruktiv və nəticəyönümlü siyasətin bariz nümunəsidir.
IV Şuşa Qlobal Media Forumu müxtəlif ölkələrdən media nümayəndələrini, ekspertləri və beynəlxalq təşkilatların təmsilçilərini bir araya gətirərək qlobal informasiya məkanında aktual məsələlərin müzakirəsi üçün mühüm platformaya çevrildi. Forum çərçivəsində Prezident İlham Əliyevin səsləndirdiyi fikirlər Azərbaycanın regional proseslərə baxışını, açıq dialoqa və beynəlxalq əməkdaşlığa verdiyi əhəmiyyəti bir daha nümayiş etdirdi.
Bu gün Azərbaycan təkcə regionun deyil, Avrasiya məkanının da etibarlı tərəfdaşlarından biri kimi tanınır. Ölkəmizin təşəbbüsü ilə həyata keçirilən layihələr dövlətlər arasında qarşılıqlı etimadı möhkəmləndirir, iqtisadi inkişafı sürətləndirir və yeni əməkdaşlıq imkanları yaradır. Azərbaycanın balanslaşdırılmış xarici siyasəti və vasitəçilik təşəbbüsləri də gərginliyin azaldılmasına, sabitliyin möhkəmləndirilməsinə və əməkdaşlığın inkişafına xidmət edir.
Prezident İlham Əliyevin “Bizim rolumuz hər zaman konstruktiv və nəticəyönümlü olub, gərginliyin azaldılmasına hesablanıb” fikri Azərbaycanın xarici siyasət kursunun əsas mahiyyətini əks etdirir. Bu siyasət milli maraqların qətiyyətlə qorunması ilə yanaşı, regionda sülhün, təhlükəsizliyin və davamlı inkişafın təmin edilməsinə yönəlmiş strateji yanaşmanın ifadəsidir. Məhz bu prinsipial mövqe sayəsində Azərbaycan beynəlxalq aləmdə etibarlı tərəfdaş kimi nüfuzunu daha da möhkəmləndirməkdə davam edir.
Amil İsrayılov
YAP Şirvan şəhər təşkilatının məsləhətçisi
