21 aprel 2025-ci ildə Azərbaycan Respublikasının Prezidenti İlham Əliyevin Çin Xalq Respublikasının rəsmi xəbər agentliyi olan Sinxua agentliyinə verdiyi yazılı müsahibə, iki ölkə arasında əlaqələrin hazırkı səviyyəsini və gələcək inkişaf perspektivlərini əhatə edən mühüm bir hadisə kimi dəyərləndirilə bilər. Bu müsahibədə Prezident Əliyev, 2024-cü ilin iyul ayında Astanada keçirilən Şanxay Əməkdaşlıq Təşkilatının sammiti çərçivəsində Çin Prezidenti Si Cinpin ilə imzalanan “Strateji Tərəfdaşlığın Qurulması Haqqında Birgə Bəyanat”ın xüsusi əhəmiyyət daşıdığını vurğulayaraq, bu sənədin Azərbaycan-Çin münasibətlərində yeni bir səhifə açdığını qeyd edib.
Bəyannamənin imzalanması ilk növbədə, iki ölkə arasında siyasi etimadın və qarşılıqlı hörmətin daha da dərinləşdiyini göstərir. Azərbaycanın müstəqil xarici siyasət kursu və Çinlə qarşılıqlı maraqlara əsaslanan münasibətləri, bu bəyannamənin hüquqi və siyasi əsasını təşkil edir. Tarixi hadisə kimi qiymətləndirilən bu sənəd, sadəcə siyasi niyyətlərin bəyanı deyil, eyni zamanda əməkdaşlığın konkret istiqamətlər üzrə inkişafına zəmin yaradan praktiki addımları da özündə əks etdirir.
Azərbaycan – Çin münasibətlərinin gələcəyi qarşılıqlı fayda prinsipinə əsaslanaraq daha da inkişaf edəcək. İqlim dəyişikliyi ilə mübarizə, yaşıl enerji, rəqəmsal texnologiyalar sahəsində əməkdaşlıq gələcək prioritetlər arasında yer tutur. Çin texnologiyasının inkişaf etmiş olması, Azərbaycanın isə regionda sabit və strateji tərəfdaş mövqeyində dayanması bu münasibətləri daha da möhkəmləndirə bilər.
Azərbaycan Çin münasibətləri bir çox istiqamətdə uğurla inkişaf edir və qarşılıqlı strateji maraqlara əsaslanır. Bu əməkdaşlıq yalnız ikitərəfli deyil, regional və qlobal səviyyədə də əhəmiyyətli təsirə malikdir. Qarşılıqlı hörmət, əməkdaşlıq və ortaq maraqlar üzərində qurulmuş bu münasibətlərin gələcəkdə daha da dərinləşəcəyi gözlənilir.
Aytac Məhərrəmli,
Yeni Azərbaycan Partiyası Nizami rayon təşkilatının məsləhətçisi
