Qarabağın mədəniyyət paytaxtı Şuşa və milli musiqi irsimiz
Şuşa Azərbaycan mədəniyyətinin, musiqisinin və ədəbiyyatının inkişafında müstəsna rol oynamış şəhərlərimizdəndir. Bu qədim şəhər tarixən görkəmli şairlər, bəstəkarlar, xanəndələr və musiqi xadimləri yetişdirib. Qarabağın tacı hesab olunan Şuşa milli mədəniyyətimizin zənginliyini və Azərbaycan xalqının yaradıcılıq qüdrətini özündə birləşdirir.
Şuşanın işğalı xalqımızın mədəni həyatına ağır zərbə vurmuşdu. Lakin Prezident İlham Əliyevin rəhbərliyi ilə Azərbaycan Ordusunun 2020-ci il noyabrın 8-də şəhəri azad etməsi bu tarixi mərkəzin yenidən dirçəlməsinə imkan yaratdı. Şuşanın azadlığı yalnız ərazi baxımından deyil, milli-mənəvi dəyərlərin bərpası baxımından da böyük əhəmiyyət daşıyırdı.
Şəhər azad edildikdən sonra burada mədəni irsin qorunması və yenidən canlandırılması istiqamətində mühüm tədbirlər həyata keçirildi. Tarixi abidələr bərpa olundu, musiqi tədbirləri təşkil edildi, mədəniyyət müəssisələrinin fəaliyyəti yenidən quruldu. “Xarıbülbül” Musiqi Festivalının Şuşada keçirilməsi şəhərin mədəni həyatının canlanmasının rəmzlərindən birinə çevrildi.
Şuşanın mədəniyyət paytaxtı elan olunması onun Azərbaycan tarixindəki xüsusi mövqeyini bir daha təsdiqlədi. Burada keçirilən beynəlxalq tədbirlər, konsertlər və yaradıcılıq görüşləri şəhərin zəngin mədəni irsini dünya ictimaiyyətinə tanıdır. Şuşa bu gün keçmişlə gələcəyin, milli ənənələrlə müasir mədəniyyətin qovuşduğu məkandır.
Zəfər Günü münasibətilə Şuşanın azadlığı və mədəni həyatının yenidən dirçəlməsi xüsusi qürur hissi doğurur. Şəhərin musiqi ənənələri, tarixi abidələri və sənət irsi Azərbaycan xalqının milli sərvətidir. Şuşanın yenidən mədəniyyət mərkəzinə çevrilməsi tarixi Qələbənin ən qiymətli mənəvi nəticələrindəndir.
Lətifə Nəsirova,
YAP Nizami rayon təşkilatının “Keşlə qəsəbəsi, Sabir küçəsi, 61” ərazi partiya təşkilatının sədr müavini
