Milli mətbuatın inkişaf yolu keşməkeşli, lakin şərəfli olmuşdur
22 İyul Azərbaycan milli mətbuatının yaranma günüdür və bu tarix ölkəmizdə Milli Mətbuat Günü kimi qeyd olunur. Bu günün əsası 1875-ci ildə Həsən bəy Zərdabinin təşəbbüsü ilə nəşr olunan “Əkinçi” qəzetinin ilk nömrəsinin çapdan çıxması ilə qoyulmuşdur. Bu qəzet təkcə Azərbaycanın deyil, ümumilikdə Cənubi Qafqazın ilk milli mətbu orqanı hesab olunur.
“Əkinçi” qəzeti xalqın maariflənməsi, milli özünüdərk hissinin oyanması və cəmiyyətin inkişafı baxımından mühüm rol oynamışdır. Həsən bəy Zərdabi həmin dövrdə böyük risklərə baxmayaraq, mətbuat vasitəsilə cəmiyyətin savadlanmasına, xalqın sosial problemlərinin işıqlandırılmasına çalışmışdır.
Milli mətbuatın inkişaf yolu keşməkeşli, lakin şərəfli olmuşdur. XX əsrin əvvəllərində “Molla Nəsrəddin”, “Füyuzat”, “İrşad” kimi mətbu orqanlar milli oyanışın əsas təbliğat vasitələrinə çevrilmişdi. Sovet dövründə mətbuat daha çox dövlətin rəsmi ideologiyasına xidmət etsə də, bu dövrdə də bir sıra maarifləndirici və ədəbi-bədii nəşrlər meydana gəlmişdir.
Azərbaycan müstəqillik qazandıqdan sonra mətbuat daha azad və çoxsəsli xarakter almağa başlamışdır. 1998-ci ildə Ulu Öndər Heydər Əliyevin təşəbbüsü ilə senzuranın ləğv edilməsi Azərbaycan mətbuatının inkişafında yeni mərhələ yaratdı. Bu, söz və fikir azadlığı üçün mühüm addım oldu.
Hazırda ölkədə yüzlərlə qəzet, jurnal, internet saytı və televiziya kanalı fəaliyyət göstərir. Mətbuatın əsas funksiyası – ictimai rəyin formalaşdırılması, informasiya təminatı və ictimai nəzarətin həyata keçirilməsidir.
Prezident İlham Əliyev mətbuatın inkişafına xüsusi diqqət göstərir. Medianın maddi-texniki bazasının möhkəmləndirilməsi, jurnalistlərin mənzil şəraitinin yaxşılaşdırılması istiqamətində dövlət tərəfindən mühüm addımlar atılmışdır. Medianın peşəkarlaşdırılması, dezinformasiyanın qarşısının alınması və etik jurnalistika prinsiplərinin təşviqi də bu sahədə əsas vəzifələrdəndir.
Bununla yanaşı, müasir dövrdə sosial media platformalarının artması informasiya bolluğuna və bəzən də yanlış məlumatların yayılmasına səbəb olur. Bu səbəbdən jurnalistlərin məsuliyyəti daha da artır. Etibarlı, yoxlanılmış və balanslı məlumat təqdim etmək peşəkar medianın başlıca vəzifəsidir.
22 İyul – Milli Mətbuat Günü yalnız jurnalistlərin bayramı deyil, həm də cəmiyyətin informasiya məkanında daha şüurlu olmağa çağırış günüdür. Bu gün, həmçinin, medianın keçdiyi tarixi yola baxış və gələcəyə dair düşüncə günüdür.
Bu əlamətdar gündə öz peşələrini vicdanla yerinə yetirən, cəmiyyətin informasiyaya çıxış hüququnu təmin edən bütün jurnalistləri və media nümayəndələrini təbrik edir, onlara fəaliyyətlərində uğurlar arzulayırıq. Onların fəaliyyəti sayəsində cəmiyyət məlumatlanır, inkişaf edir və daha şəffaf olur.
Əlizadə Günel
Yeni Azərbaycan partiyası,məsləhətçi
