Şuşa şəhəri Azərbaycanın mədəni irsinin simvolu, tarix və mədəniyyət paytaxtıdır. Qarabağın incisindən sayılan bu qədim şəhər 1752-ci ildə Qarabağ xanı Pənahəli xan tərəfindən strateji mövqedə salınmışdır. Şuşa şəhəri ilk vaxtlardan mədəniyyətin, musiqinin və sənətin mərkəzi kimi tanınmışdır. Bu qədim şəhər musiqi ənənələri, zəngin ədəbiyyatı və mədəniyyəti ilə Azərbaycan tarixində mühüm yer tutmuşdur. Burada dahi şairlər, bəstəkarlar, müğənnilər yetişmiş və şəhər hər zaman Azərbaycanın ən mühüm mədəniyyət mərkəzlərindən biri olmuşdur. Şuşamız, təəssüf ki, 1992-ci il mayın 8-də Ermənistan tərəfindən işğal edildi. İşğal nəticəsində şəhərin tarixi abidələri, məscidləri və mədəniyyət ocaqları dağıdıldı, talan edildi və mənəvi dəyərlərimizə ağır zərbə vuruldu.
Şuşanın işğalı Azərbaycanın tarixi və mədəni irsini təhlükə altına saldı, xalqın qəlbində dərin kədər yaratdı. Bununla belə, Şuşa hər zaman azadlıq və müqavimət rəmzi olaraq qaldı. Azərbaycan xalqı inanırdı ki, bir gün bu müqəddəs torpaq yenidən azad ediləcək. Nəhayət, 8 Noyabr 2020-ci ildə, Vətən müharibəsi zamanı Azərbaycan Ordusu böyük qəhrəmanlıqla Şuşanı azad etdi. Bu hadisə xalqımızın yaddaşına qızıl hərflərlə yazıldı və Qarabağın azadlığında dönüş nöqtəsinə çevrildi. Şuşanın azad olunması yalnız hərbi qələbə deyil, həm də milli ruhun, birliyin və ədalətin təntənəsi idi. Bu tarixi zəfər Cənab Prezident İlham Əliyevin rəhbərliyi və uzaqgörən siyasəti sayəsində əldə edilmişdir.
Onun qətiyyəti, sarsılmaz iradəsi və xalqla birliyi nəticəsində Azərbaycan torpaqları azad edildi. Şuşanın azadlığı həm də 30 illik ədalətsizliyə son qoydu. Bu hadisə təkcə hərb tarixi deyil, həm də milli kimliyimizin, dövlət müstəqilliyimizin təntənəsi kimi dəyərləndirilir. Hər il 8 noyabr tarixində Şuşanın azad edilməsi günü – Zəfər Günü kimi qeyd olunur və xalqımız bu qürur dolu günü minnətdarlıqla xatırlayır. Şuşa Azərbaycan ədəbiyyatının, musiqisinin beşiyi, mədəniyyətin nəfəs aldığı məkandır. Burada Üzeyir Hacıbəyli, Bülbül, Natəvan kimi sənətkarlar doğulmuş, Azərbaycan mədəniyyətinin formalaşmasında böyük rol oynamışlar. Şəhərdəki qədim abidələr, məscidlər, qala divarları və tarixi küçələr xalqımızın keçmişinin canlı şahidləridir. Şuşanın azadlığı bu mədəni irsin yenidən dirçəlməsi üçün böyük fürsət yaratmışdır.
İndiki dövrdə burada “Xarıbülbül” musiqi festivalı, poeziya günləri, teatr tamaşaları və beynəlxalq tədbirlər keçirilir. Bu, Şuşanın yenidən regionun mədəni mərkəzinə çevrilməsinə zəmin yaradır. Şəhərdə aparılan bərpa və yenidənqurma işləri Şuşanı həm tarixi ruhunu qoruyan, həm də müasir simaya sahib bir şəhərə çevirir. Artıq bura həm yerli, həm də xarici turistlərin böyük maraq göstərdiyi bir məkana çevrilib. Hər gələn insan Şuşanın havasında milli qüruru, tariximizin izlərini və xalqımızın yenilməz ruhunu hiss edir. Bu gün Şuşa təkcə Qarabağın deyil, bütün Azərbaycanın dirçəliş simvoluna çevrilmişdir. Burada görülən işlər, salınan yollar, bərpa olunan evlər və tikilən yeni mədəniyyət ocaqları dövlətimizin gücünü və xalqımızın birliyini göstərir.
Cənab Prezident İlham Əliyev hər çıxışında Şuşanı Azərbaycanın milli qürur mənbəyi adlandırır və şəhərin gələcək inkişafını xüsusi diqqət mərkəzində saxlayır. Şuşa artıq beynəlxalq tədbirlərə, konfranslara və mədəni görüşlərə ev sahibliyi edən bir şəhərə çevrilməkdədir. Şuşanın azadlığı ilə Azərbaycan xalqı sübut etdi ki, haqq səsi, ədalət və milli birlik qarşısında heç bir güc dayana bilməz. Bu gün Şuşa yalnız bir şəhər deyil, xalqın əzmini, mədəni irsini və gələcəyə inamını simvolizə edən müqəddəs bir məkandır. Bu əbədi Zəfər ruhu gələcək nəsillərə qürur, vətənpərvərlik və milli kimlik dərsi kimi əmanət qalacaq.
Sahil Əliyev,
Yeni Azərbaycan Partiyası, məsləhətçi
