Azərbaycan xalqı tarix boyu azadlıq və müstəqillik uğrunda böyük sınaqlardan keçmişdir. Zaman keçib, dövr dəyişib, amma xalqımızın bir arzusu dəyişməyib: azad yaşamaq və öz dövlətinin sahibi olmaq. Bu baxımdan 20 sentyabr, Azərbaycan tarixində sadəcə bir gün deyil, bir millətin əzmini, iradəsini və milli mübarizə ruhunu əks etdirən unudulmaz bir tarixdir.
1991-ci il 20 sentyabrda qəbul edilən “Azərbaycan Respublikasının Dövlət Suverenliyi haqqında Bəyannamə” xalqımızın taleyində dönüş nöqtəsi oldu. Bu bəyannamə ilə Azərbaycan, öz dövlət müstəqilliyinə gedən yolda ən mühüm addımı atdı. O vaxt sovet imperiyasının əsarətindən çıxmaq asan deyildi; hər addım riskli olsa da, xalqımızın qətiyyəti hər çətinliyi aşmağa imkan verdi.
Bəyannamədə Azərbaycanın sərhədlərinin toxunulmazlığı, dövlət rəmzlərinin müqəddəsliyi və xalqın milli sərvətlər üzərində tam hüququ təsdiq edildi. Bu, sadəcə hüquqi sənəd deyildi, həm də azərbaycançılıq ideyasının və milli dövlətçilik düşüncəsinin bünövrə daşı idi.
Suverenlik – sadəcə qanunla təsbit olunmuş müstəqillik deyil. Suverenlik, hər bir vətəndaşın azad nəfəs alması, öz dilində danışması və öz bayrağına baxanda qürur duyması deməkdir. O gün bu qərar qəbul olunmasaydı, bu gün biz azərbaycanlı olaraq sərbəst şəkildə milli kimliyimizi ifadə edə bilməzdik.
Bu gün hər birimiz məktəbdə Azərbaycan dilində təhsil alır, mədəniyyətimizi sərbəst şəkildə inkişaf etdiririk və öz bayrağımızı dünyanın hər yerində dalğalandırırıqsa, bunun kökü məhz 20 sentyabrda atılan addımlara gedib çıxır.
Müstəqillik asan qazanılmır, amma daha çətini onu qorumaqdır. 20 sentyabr bizə yalnız keçmişi xatırlatmır, həm də gələcək nəsillərə böyük bir məsuliyyət qoyur. Bu məsuliyyət – müstəqil Azərbaycanı daha güclü və daha qüdrətli etmək borcudur.
Bu gün Azərbaycanın bütün sahələrdə, siyasətdə, iqtisadiyyatda, orduda, diplomatiyada, elm və mədəniyyətdə əldə etdiyi uğurlar, 1991-ci ildə atılan o tarixi addımın bəhrəsidir. Suverenlik yalnız siyasi müstəqillik deyil, həm də xalqın öz sözünü demək haqqıdır. Bu gün biz müstəqil dövlət olaraq bayrağımızın altında yaşamağın qürurunu duyur, dilimizi, mədəniyyətimizi və ənənələrimizi sərbəst şəkildə qoruyub inkişaf etdiririk. Hər bir vətəndaş bu günün dəyərini hiss etməli və dövlətçiliyimizin möhkəmlənməsi üçün öz payını verməlidir.
20 sentyabr bizə bir daha xatırladır ki, suverenlik əbədi və dönməzdir. Azərbaycanın bu yolda atdığı addımlar və əldə etdiyi uğurlar müstəqil dövlətimizin gələcəyinə olan inamımızı daha da artırır. Bu günün əhəmiyyəti yalnız keçmişə deyil, həm də gələcəyə bağlıdır. Çünki suveren dövlət olmaq – nəsillərdən-nəsillərə ötürülən ən böyük sərvət, ən müqəddəs mirasdır!
Selcan Novruzova
YAP Nizami rayon təşkilatının məsləhətçisi
