Azərbaycan və Şimali Makedoniya arasında son illərdə güclənən diplomatik əlaqələr, iki ölkənin müxtəlif sahələrdə əməkdaşlığını daha da dərinləşdirmişdir. Bu əməkdaşlıq yalnız ikitərəfli münasibətləri deyil, həm də regional inkişafı və sabitliyi təmin etmək baxımından əhəmiyyət kəsb edir. Beləliklə, enerji, ticarət, mədəniyyət və digər sahələrdə strateji tərəfdaşlıq hər iki ölkənin uzunmüddətli məqsədlərinə çatmasında mühüm rol oynamaqdadır. Son zamanlarda dövlət başçılarının qarşılıqlı səfərləri və yüksək səviyyəli görüşlər bu əməkdaşlığın güclənməsinə səbəb olmuşdur. Prezident İlham Əliyevin bildirdiyinə görə, ikitərəfli siyasi əlaqələrin inkişafı üçün əlavə tədbirlər görülməlidir və müvafiq dövlət qurumları sıx təmasda olmalıdırlar. Xüsusilə iqtisadi və sərmayə qoyuluşu sahəsində əlaqələrin dərinləşdirilməsi vacibdir. Şimali Makedoniya ilə Azərbaycan arasında diplomatik təmaslar, həmçinin regional və beynəlxalq təşkilatlar çərçivəsində də möhkəmlənməkdədir. Azərbaycanın Avropa İttifaqı və Balkan ölkələri ilə əlaqələrinin genişlənməsi fonunda Şimali Makedoniya ilə əməkdaşlıq xüsusi əhəmiyyət daşıyır. Bakı və Skopye arasında yüksək səviyyəli görüşlərin intensivləşməsi, strateji planların daha sürətli icrasına şərait yaradır. Enerji sahəsində əməkdaşlıq Azərbaycan və Şimali Makedoniya münasibətlərinin ən vacib istiqamətlərindən biridir. 2023-cü ilin sonlarında Azərbaycan qazı artıq Şimali Makedoniya bazarına çatdırılmış və müntəzəm tədarük prosesi başlanmışdır. Azərbaycanın Avropa İttifaqı ilə enerji sahəsindəki strateji tərəfdaşlığı çərçivəsində qaz təchizatının genişləndiri lməsi nəzərdə tutulur. Bu, həm Azərbaycanın enerji ixracını artırmasına, həm də Şimali Makedoniyanın enerji təhlükəsizliyini möhkəmləndirməsinə şərait yaradır. Azərbaycanın Cənub Qaz Dəhlizi və TAP layihələri Balkan regionu üçün mühüm əhəmiyyət daşıyır. Şimali Makedoniya, bu boru kəmərləri vasitəsilə enerji resurslarının şaxələndirilməsinə töhfə verə bilər. Eyni zamanda, Azərbaycanın bərpa olunan enerji sahəsindəki təcrübəsi və investisiya imkanları, Şimali Makedoniyada alternativ enerji mənbələrinin inkişafına töhfə verə bilər. İqtisadi sahədə iki ölkə arasında müxtəlif sazişlər imzalanmışdır. 2013-cü ildə sərmayələrin qarşılıqlı qorunması və ikiqat vergitutmanın aradan qaldırılması barədə razılaşmalar əldə edilmişdir. Lakin bu sahədə daha çox iş görülməli və ticarət dövriyyəsi artırılmalıdır. Hal-hazırda, iki ölkə arasında ticarət dövriyyəsi hələ də potensialından tam istifadə etmir. Şimali Makedoniya, Avropa bazarına çıxış üçün strateji mövqeyə malik olduğundan, Azərbaycan investorları üçün cəlbedici bir ölkə ola bilər. Xüsusilə kənd təsərrüfatı, infrastruktur layihələri və informasiya texnologiyaları sahələrində əməkdaşlıq üçün geniş imkanlar mövcuddur. Hər iki ölkənin iş adamlarının qarşılıqlı görüşləri və biznes forumlarının təşkili bu istiqamətdə irəliləyişə səbəb ola bilər. Humanitar sahədə əməkdaşlıq da önəmlidir. Şimali Makedoniya Prezidenti Azərbaycana səfəri zamanı mədəni tədbirlərdə iştirak etmiş, həmçinin XII Qlobal Bakı Forumunda çıxış etmişdir. Təhsil və mədəniyyət sahəsində əməkdaşlığın genişləndirilməsi xalqlar arasında daha sıx əlaqələrin qurulmasına kömək edə bilər. Azərbaycan və Şimali Makedoniya arasında mədəniyyət sahəsində əməkdaşlığın inkişaf etdirilməsi məqsədilə müxtəlif tədbirlər keçirilir. Azərbaycan mədəniyyəti və incəsənəti Şimali Makedoniyada tanıdılır, eyni zamanda Şimali Makedoniya mədəni irsi Azərbaycanda təbliğ olunur. İki ölkə arasında tələbə mübadilə proqramları və akademik əməkdaşlıq da güclənməkdədir. Bütün bu addımlar Azərbaycan və Şimali Makedoniya arasında strateji tərəfdaşlığın möhkəmlənməsinə xidmət edir. Gələcəkdə ikitərəfli münasibətlərin daha da inkişaf edəcəyi gözlənilir. Xüsusilə enerji, ticarət və mədəniyyət sahələrində əməkdaşlığın dərinləşdirilməsi hər iki ölkənin iqtisadi və sosial inkişafına töhfə verəcəkdir. Eyni zamanda, Azərbaycan və Şimali Makedoniya arasında diplomatik münasibətlərin daha da gücləndirilməsi, birgə layihələrin icrası və qarşılıqlı investisiya imkanlarının artırılması hər iki ölkənin regional mövqeyini gücləndirəcəkdir. Bununla yanaşı, beynəlxalq təşkilatlar çərçivəsində əməkdaşlığın gücləndirilməsi və birgə təşəbbüslərin dəstəklənməsi, həmçinin təhsil və elmi tədqiqat sahəsində əlaqələrin inkişafı gələcək perspektivlər arasında yer alır. Azərbaycan və Şimali Makedoniya əməkdaşlığının yeni mərhələyə qədəm qoyması hər iki xalqın rifahına və regionda sabitliyin möhkəmlənməsinə töhfə verəcəkdir.
Sevinc Qəhrəmanova ,
YAP-ın gənc fəalı
