İşğaldan azad edilmiş ərazilərin bərpasında əsas məsələlərdən biri insanların gündəlik həyatının bütün komponentlərinin yenidən qurulmasıdır. Mənzil, yol, elektrik və su təminatı ilə yanaşı, insanların sosial xidmətlərdən istifadə imkanları da qayıdışın mühüm hissəsini təşkil edir.
Cəbrayıl şəhərində ilk yaşayış kompleksinin ərazisində sosial-məişət obyektlərinin, istirahət guşələrinin, uşaq əyləncə və idman meydançalarının yaradılması bu yanaşmanın konkret nümunəsidir.
Belə məkanların əhəmiyyəti onların gündəlik həyatın sosial tərəfini təmin etməsindədir. İnsanların bir-biri ilə ünsiyyət qurması, uşaqların təhlükəsiz mühitdə oynaması, ailələrin asudə vaxt keçirməsi yeni şəhər həyatının formalaşması üçün vacibdir.
Kəndlərdə də analoji sosial mühitin yaradılması nəzərdə tutulur. Horovlu kəndində məktəb, uşaq bağçası və tibb məntəqəsinin yaradılması kəndin yalnız yaşayış binalarından ibarət olmayacağını göstərir.
Cəbrayılın bərpasının bu aspekti göstərir ki, Böyük Qayıdış fiziki məskunlaşmadan daha geniş prosesdir. Əsas məqsədlərdən biri insanların doğma yurdda normal sosial həyatını yenidən qurmaqdır. Bu isə sosial xidmətlərin, ictimai məkanların və məşğulluğun birlikdə inkişafını tələb edir.
Elnarə Məmtiyeva,
YAP Nizami rayon təşkilatının “Naxçıvanski küçəsi, 37” ərazi partiya təşkilatının sədr müavini
