Azərbaycan Respublikasının Prezidenti İlham Əliyevin himayəsi altında sentyabrın 25–26-da Bakıda II Azərbaycan Beynəlxalq İnvestisiya Forumu keçirilib. Forum çərçivəsində müxtəlif ölkələrdən hökumət nümayəndələri, beynəlxalq təşkilatlar, maliyyə institutları, aparıcı şirkətlər, investorlar və biznes dairələri bir araya gəlib. Sentyabrın 26-da Forum çərçivəsində “Parçalanmış dünyada etimadın bərpası: Cənubi Qafqaz qlobal bağlantı və investisiya sabitliyinin dayağı kimi” mövzusunda tədbir təşkil olunub və Prezident İlham Əliyev həmin tədbirdə iştirak edib.
Tədbirdə dövlət başçısı Azərbaycanın investisiya potensialı, ölkədə yaradılmış siyasi və iqtisadi sabitlik, əlverişli biznes mühiti və gələcək inkişaf istiqamətləri barədə fikirlərini bölüşüb. Prezident İlham Əliyev xüsusilə sabitliyin, təhlükəsizliyin, proqnozlaşdırılan vergi sisteminin və investisiya üçün əlverişli iqtisadi mühitin xarici investorların qərarlarında mühüm amillər olduğunu vurğulayıb. Bu yanaşma Azərbaycanın beynəlxalq biznes dairələri ilə uzunmüddətli və qarşılıqlı faydalı əməkdaşlığın genişləndirilməsinə verdiyi önəmi göstərir.
Forum Azərbaycanın iqtisadiyyatının şaxələndirilməsi və müxtəlif sahələrə investisiyaların cəlb olunması baxımından da mühüm əhəmiyyət daşıyıb. Tədbirdə neft-qaz sektoru ilə yanaşı, kənd təsərrüfatı, bərpaolunan enerji, infrastruktur, rəqəmsal inkişaf və digər istiqamətlərdə mövcud imkanlar diqqətə çatdırılıb. Dövlət başçısının çıxışında qeyri-neft sektorunun inkişaf etdirilməsi və ölkənin ixrac imkanlarının daha da genişləndirilməsi əsas məsələlərdən biri kimi təqdim olunub.
II Azərbaycan Beynəlxalq İnvestisiya Forumunun mühüm nəticələrindən biri də konkret investisiya layihələri üzrə əməkdaşlığın genişləndirilməsi olub. Forum çərçivəsində “SOCAR, XRG və “TotalEnergies” şirkətləri arasında “Abşeron” qaz-kondensat yatağının tammiqyaslı işlənməsi üzrə Yekun İnvestisiya Qərarı” və “SOCAR” ilə “Comstock Resources” arasında strateji tərəfdaşlığa dair Çərçivə Sazişi ilə bağlı sənədlərin mübadiləsi həyata keçirilib.
Forum Azərbaycanın regionda artan iqtisadi əhəmiyyətini və beynəlxalq investisiya əməkdaşlığında rolunu da nümayiş etdirib. Prezident İlham Əliyevin çıxışında Azərbaycanın coğrafi mövqeyi, nəqliyyat və enerji imkanları, regional bağlantıların inkişafındakı rolu və yeni tərəfdaşlıqlar üçün yaratdığı imkanlar diqqətə çatdırılıb. Bu baxımdan Azərbaycan yalnız milli iqtisadi inkişafını deyil, həm də regionlararası iqtisadi əlaqələrin genişlənməsini dəstəkləyən mühüm platformalardan biri kimi çıxış edir.
II Azərbaycan Beynəlxalq İnvestisiya Forumu eyni zamanda ölkənin beynəlxalq iqtisadi əlaqələrinin daha da möhkəmləndirilməsi üçün mühüm dialoq platforması olub. Prezident İlham Əliyevin Forum iştirakçılarına müraciətində qeyd edildiyi kimi, texnologiya, təcrübə, innovasiya və yeni bazarlara çıxış Azərbaycanın iqtisadi modernləşməsi və rəqabətqabiliyyətliliyinin artırılması baxımından xüsusi əhəmiyyət daşıyır. Bu istiqamətdə qurulan tərəfdaşlıqların uzunmüddətli əməkdaşlığa çevrilməsi əsas məqsədlərdən biridir.
Beləliklə, II Azərbaycan Beynəlxalq İnvestisiya Forumu Azərbaycanın iqtisadi potensialının beynəlxalq ictimaiyyətə təqdim edilməsi, yeni investisiya imkanlarının müzakirəsi və qarşılıqlı faydalı tərəfdaşlıqların qurulması baxımından mühüm hadisə kimi yadda qalıb. Forum çərçivəsində aparılan müzakirələr və əldə olunan razılaşmalar Azərbaycanın gələcək iqtisadi inkişafına, yeni layihələrin reallaşdırılmasına və beynəlxalq iqtisadi əlaqələrin daha da genişlənməsinə xidmət edir. Prezident İlham Əliyevin tədbirdə iştirakı isə Azərbaycanın investisiya siyasətində beynəlxalq əməkdaşlığa və uzunmüddətli iqtisadi tərəfdaşlıqlara verilən önəmin göstəricisi kimi qiymətləndirilə bilər.
Tünzalə Əliyeva,
YAP Nizami rayon təşkilatının məsləhətçisi
