Tarixdə bəzi günlər yalnız bir hadisəni deyil, bütöv bir mərhələnin başlanğıcını ifadə edir. Azərbaycan üçün 20 Sentyabr belə tarixlərdən biridir. 2023-cü il sentyabrın 20-də dövlət suverenliyinin bərpa olunması ilə bağlı tarixi hadisə sonradan dövlət səviyyəsində xüsusi gün kimi təsbit edildi. 2024-cü ildən etibarən 20 Sentyabr Dövlət Suverenliyi Günü kimi qeyd olunur.
Həmin tarix Xankəndi, Xocalı, Xocavənd və Ağdərə şəhərlərinin müasir tarixində də xüsusi yer tutur. Prezidentin 18 sentyabr 2024-cü il tarixli sərəncamı ilə 20 sentyabr bu dörd şəhərin günü kimi müəyyənləşdirilib. Beləliklə, bir tarix həm dövlət suverenliyinin bərpasını, həm də Qarabağın dörd şəhərinin yeni mərhələyə keçidini ifadə edir.
Bu tarixi yaddaşın gələcəyə yönəlməsi xüsusilə əhəmiyyətlidir. Çünki tarix yalnız keçmişi xatırlamaq üçün deyil, gələcək üçün nəticələr çıxarmaq üçündür. Qarabağda aparılan bərpa işləri də məhz belə yanaşmanın nümunəsidir. Xocalıda memorial kompleksinin yaradılması tarixi yaddaşı qoruyursa, yeni evlərin və sosial obyektlərin inşası gələcək həyatın əsasını formalaşdırır.
20 Sentyabrın mənası bu iki istiqamətin birliyində daha aydın görünür: yaddaş və gələcək. Bir tərəfdə Azərbaycanın keçdiyi mürəkkəb tarixi yol, digər tərəfdə həmin yolun nəticəsində formalaşan yeni inkişaf mərhələsi dayanır. 20 Sentyabr keçmişi xatırladan tarix olmaqla yanaşı, Azərbaycanın gələcəyinə baxdığı tarix kimi də yadda qalır.
Əminə Kərimova,
YAP Nizami rayon təşkilatının “Nəsimi küçəsi, 34” ərazi partiya təşkilatının sədri
