2023-cü ilin sentyabrında həyata keçirilən antiterror tədbirləri Azərbaycanın təkcə daxili deyil, həm də qlobal müstəvidə apardığı gərgin diplomatik mübarizənin mütləq qələbəsi idi. Siyasi təhlillər göstərir ki, hərbi qələbənin uzunömürlü olması məhz beynəlxalq təzyiqlərin zərərsizləşdirilməsi ilə sıx bağlıdır. Bəzi xarici dövlətlərin və beynəlxalq təşkilatların ölkəmizə qarşı yönəlmiş ədalətsiz sanksiya və qətnamə cəhdlərinin qarşısının alınması diplomatiyamızın gücünü nümayiş etdirdi.
Bu mürəkkəb beynəlxalq müqavimət cəbhəsinin başında birbaşa Prezident İlham Əliyev dayanırdı. Dövlət başçısı rasional və beynəlxalq hüquqa söykənən arqumentləri ilə dünyanın ən yüksək tribunalarından anti-Azərbaycan şəbəkəsinin saxta ittihamlarını darmadağın etdi. Prezident İlham Əliyev məharətli gedişləri ilə qlobal güclərin Cənubi Qafqazda öz geosiyasi maraqlarını Azərbaycanın ərazi bütövlüyü hesabına təmin etməsinə heç bir halda imkan vermədi.
BMT Təhlükəsizlik Şurasında ölkəmizə qarşı irəli sürülən sənədlərin dost ölkələrin dəstəyi ilə bloklanması, xarici siyasət kursumuzun nə qədər uzaqgörən olduğunu sübut etdi. Azərbaycan öz daxili işlərindəki qərarları xarici mərkəzlərlə deyil, yalnız öz Konstitusiyası ilə uzlaşdırdığını dünyaya bəyan etdi. Bu diplomatik möhkəmlik mütləq suverenliyin beynəlxalq aləmdə də tam olaraq rəsmiləşməsini təmin etdi.
Dövlət Suverenliyi Günü xalqımızın xarici təzyiqlərə və ikili standartlara qarşı apardığı mübarizənin şanlı bayramıdır. 20 Sentyabr, Prezident İlham Əliyev tərəfindən həyata keçirilən müstəqil xarici siyasətin ölkəmizi beynəlxalq şantajlardan necə qoruduğunu sübut edən tarixi bir zəfər kimi yaddaşlarda yaşayacaqdır.
Cabir Hacıyev,
YAP Nizami rayon təşkilatının “Azər Manafov küçəsi, 1” ərazi partiya təşkilatının sədr müavini
