Türkmənistan Prezidenti Sərdar Berdiməhəmmədovun Azərbaycana reallaşdırdığı dövlət səfəri Bakı ilə Aşqabad arasında strateji tərəfdaşlığın yeni və daha dinamik mərhələyə qədəm qoyduğunu növbəti dəfə nümayiş etdirdi. Xəzər dənizinin ayırdığı yox, əksinə, birləşdirdiyi bu iki qardaş dövlətin rəhbərlərinin görüşü həm ikitərəfli əlaqələr, həm də regional geosiyasi mənzərə baxımından mühüm əhəmiyyət kəsb edir.
Səfər çərçivəsində Azərbaycan Prezidenti İlham Əliyev və Türkmənistan Prezidenti Sərdar Berdiməhəmmədov arasında həm təkbətək, həm də geniş tərkibdə görüşlər keçirilib. Danışıqların əsas xəttini iqtisadi-ticari dövriyyənin artırılması, logistika potensialının tam gücü ilə reallaşdırılması və enerji təhlükəsizliyi məsələləri təşkil edib. Ali səviyyəli görüşlərin yekunu olaraq iki ölkə arasında müxtəlif sahələri əhatə edən ikitərəfli sənədlər mübadiləsi aparılıb. İmzalanan yeni sazişlər hüquqi-normativ bazanı gücləndirməklə yanaşı, investisiya, nəqliyyat və humanitar sahələrdə birgə addımların atılmasına yol açır.
Liderlərin mətbuata bəyanatlarla çıxışları zamanı səsləndirilən fikirlər həm bölgəyə, həm də beynəlxalq birliyə yönəlmiş aydın ismarıclar kimi xarakterizə oluna bilər. Bakıdan verilən ən mühüm mesajlardan biri Xəzər regionunun sülh, mehriban qonşuluq və əməkdaşlıq zonası olaraq qalması iradəsidir. Hər iki dövlət xarici müdaxilələrdən uzaq, daxili resurslara və qarşılıqlı hörmətə əsaslanan regional təhlükəsizlik arxitekturasının tərəfdarı olduğunu bəyan etdi.
Hər iki prezident Türk Dövlətləri Təşkilatı (TDT) çərçivəsində inteqrasiyanın dərinləşməsində maraqlı olduqlarını diqqətə çatdırdılar. Azərbaycan və Türkmənistan bu birliyin mühüm coğrafi və iqtisadi sütunlarıdır.
Bəyanatlarda xüsusi vurğulandı ki, Bakı və Aşqabad Şərq-Qərb və Şimal-Cənub nəqliyyat dəhlizlərinin kəsişməsində həlledici rol oynayır. Bakı Beynəlxalq Dəniz Ticarət Limanı ilə Türkmənbaşı Beynəlxalq Dəniz Limanı arasında koordinasiyanın gücləndirilməsi qlobal tədarük zəncirinin təhlükəsizliyinə xidmət edir.
Azərbaycan-Türkmənistan əlaqələri son illərdə sadəcə diplomatik ritorika deyil, konkret və irimiqyaslı iqtisadi layihələrlə zənginləşib. Bu əlaqələrin mərkəzində dayanan əsas istiqamətlər bunlardır:
Trans-Xəzər dəhlizi. Çindən Avropaya yükdaşımaların müddətini qısaldır və iki ölkənin tranzit gəlirlərini artırır.
Ticarət, kənd təsərrüfatı, toxuculuq və kimya sənayesi məhsullarının mübadiləsi- İkitərəfli ticarət dövriyyəsinin şaxələndirilməsini və neft-qaz sektorundan asılılığın azaldılmasını təmin edir. Sərdar Berdiməhəmmədovun Bakı səfəri göstərdi ki, Azərbaycan və Türkmənistan regional məsələlərdə eyni tezlikdə düşünürlər. İki ölkə arasındakı münasibətlər artıq regional çərçivəni aşaraq qlobal logistika və enerji xəritəsinə təsir edən faktora çevrilir.Gələcəkdə Trans-Xəzər qaz kəməri kimi nəhəng layihələrin reallaşma ehtimalı və Mərkəzi Asiya resurslarının Azərbaycan vasitəsilə Qərb bazarlarına çıxarılması bu tərəfdaşlığı daha da sarsılmaz edəcək. Bakıdan yayılan mesajlar bir daha təsdiqlədi ki, Xəzərin iki sahili strateji hədəflərə doğru birlikdə addımlayır.
Məmmədzadə Eldar,
Nizami rayonunun fəal gənci, ADA-nın tələbəsi
